„BMW Motorrad“ претстави електричен мотоцикл, кој во моментов претставува експериментална машина. Неговото име е „eRR“ и е базиран на суперспортскиот модел „S 1000 RR“.
Мотоциклот е изработен заедно со инженери од Техничкиот универзитет во Минхен и има целосно електричен агрегат. Всушност моторот е главната разлика со бензинскиот „S 1000 RR“, опремен со 1,0-литарски мотор со 198 КС и 118 Нм.
Од страна на „BMW“ не беа објавени конкретни податоци за електричниот агрегат. Сепак прецизираат, дека тој не е само поеколошки од оригиналниот, туку и обезбедува подобро забрзување. Тоа не изненадува, бидејќи електричниот скутер „BMW C Evolution“ демонстрира подобро забрзување од 0 до 60 км/час од „S 1000 RR“.
Не е јасно и кога „eRR“ ќе се претвори во сериски модел. Стартувањето на производството е речиси сигурно, бидејќи „BMW“ не е единствената компанија која посветува внимание на електричниот погон кај мотоциклите. Претходно таква машина откри и американски „Harley-Davidson“.
