Производителот на мотоцикли „Yamaha“ го претстави својот втор автомобил. Тоа е концепт кој се нарекува „SPORTS RIDE“ и се појави пред публика на отворањето на 44-иот автомобилски саем во Токио.
За разлика од првиот автомобил на „Yamaha“ – „MOTIV.e“, новото возило претставува спортска машина инспирирана од светот на моторите. Тој има две седишта и компактни димензии – должина од 3.900 мм, ширина од 1.720 мм и висина од 1.170 mm.
Вкупната тежина е само 750 килограми, а тоа е постигнато благодарение на технологијата „iStream“, патентирана од познатиот британски конструктор Гордон Мареј, кој е меѓу креаторите на суперавтомобилот „McLaren F1“. Станува збор за шасија во која се употребени малку цевки и панели од карбон.
Во моментов нема официјална информација за погонскиот систем на „Yamaha SPORTS RIDE“. Шпекулациите покажуваат дека, или станува збор за мотор од мотоцикл, или за хибриден агрегат. И во двата случаи се тврди дека бензинскиот мотор е 1,0-литарски со три цилиндри и моќност од околу 80 КС.
Дали „SPORTS RIDE“ ќе се претвори во сериско возило или ќе остане концепт, како „Yamaha MOTIV.e“, прикажан во 2013-та година, останува да видиме.