Во Крагуевац беше одбележан јубилејот од почетокот на сериското производство на првиот југословенски автомобил. Беше сигурен автомобил, евтин, достапен за повеќето граѓани.
Првиот српски и југословенски автомобил, популарниот „Фичо“, го прослави својот шеесети роденден. Во погоните на „Црвена застава“, откомври 1955-та година, по лиценца на италијански „Фиат“, стартуваше производството на овој автомобили кој и денеска може да се забележи по патиштата во поранешна Југославија, но и во Европа.
По повод на значајниот јубилеј, во неделата во Крагуевац беше одржана манифестација во организација на градот, тамошната Туристичка организација и Здружението на љубители на „Фичо“. Дефилето на автомобилите стартуваше симболично пред халата во кругот на „Застава“, каде далечната 1955-та година е произведено првото „Фичо“. Потоа за граѓаните и за сите љубители на овој автомобил беше организирано бесплатно роденденско возење по улиците на Крагуевац.
Спомените на тој перидот, но и тоа што е „Фичо“ и сега за луѓето кои го сакаат овој автомобил, ги евоцираа поранешните работници и раководители.
„Како млад работник започнав да работам токму на производството на „Фичо“. Имаше многу ентузијазам, љубов кон овој автомобил. Кај мене остана и денес, после толку години. Првото „Фичо“ го купив во 1974-та година и се уште го возам, а нема да го менувам за ниту еден друг. Тоа е некоја посебна врска која најдобро неможам да ја објаснам“, вели Душан Стевановиќ.
Директорот на „Монтажа“, Милорад Миловановиќ“, раскажа дека „Фичо“ во тоа време бил сигурен и евтин автомобил, достапен за повеќето граѓани. Вели дека во соработка со „Фиат“ го усовршувале и ги отстранувале почетните, мали недостатоци.
Во фабриката во Крагуевац, „Фичо“ се произведуваше точно триесет години, до октомври 1985-та година кога оваа програма беше прекината. За тоа време се произведени 923.487 примероци од „Фичо“, а голем број од овие автомбили, дотерани и подобрени и сега се возат по патиштата ширум светот. Имаше и предлог на „Фичо“ во Крагуевац да му се подигне споменик, но таа иницијатива се уште не е реализирана.
