На специјален настан на крајот на минатата недела „Apple“ го претстави својот нов 12.9 инчен таблет, кој се очекува да се натпреварува за корпоративни клиенти со популарниот модел на „Microsoft“ – „Surface“.
Со дебелина од 6,9 мм, новиот таблет ќе биде достапен во три бои – златна, сребрена и сива. Таблетот многу наликува на дизајн моделот „iPad Air 2“, но се одликува со технички карактеристики кои успешно можат да се натпреваруваат со десктоп компјутери.
Уредот користи 64-битен чип „A9X“ што е скоро 2 пати побрз, во споредба со чипот во моделот „iPad Air 2“. Екранот е 12,9-инчен со резолуција од 2.732 x 2.048 пиксели и заситеноста од 226 точки по инч. И покрај резолуцијата на екранот, животот на батеријата е 10 часа.
Новиот таблет има аудио систем од четири звучници кои автоматски ги балансираат десните и левите звучници за најдобар звук. Задната камера е 8 мегапикселна, а предната е од 1.2 мегапиксели. Оперативната меморија на уредот е 4 GB.
Таблетот има сензор за отпечаток, како и специјално пенкало, кое е чувствително на притисок и со неколку сензори за откривање на локација. Специјална паметна тастатура е дополнителна опција за таблетот, а таа ќе се поврзе со него безжично, преку специјални порти. Така таблетот ќе се претвори во лаптоп.
Овој уред ќе биде достапен за продажба во ноември, а цената на 32-гигабајтниот уред ќе биде 799 долари, а на 128-гигабајтниот – 949 долари.