Компанијата „Anheuser-Busch InBev“ може да понуди околу 106 милијарди долари за „SABMiller“ веќе во следните неколку денови, а првата понуда може да биде факт уште денес, информира „Sunday Times“.
Двете најголеми пиварници во светот почнаа „пријателски“ преговори, според весникот, кој се повикува на свои извори.
„SABMiller“ која ги произведува пивата „Peroni“ и „Grolsch“, зазеде конкретен став спрема „AB InBev“ во однос на цената, но во исто време не е против договор.
Од „AB InBev“ и „SABMiller“ засега одбиваат да ги коментираат информациите кои се појавија.
Претходно овој месец „AB InBev“, пиварницата која ги произведува пивата „Budweiser“, „Stella Artois“ и над 200 други брендови, направи чекор кон евентуалното стекнување на „SABMiller“.
Новата компанија би била гигант во областа и ќе произведува една третина од пивото во светот. Евентуалното спојување ќе создаде компанија со пазарна капитализација од околу 275 милијарди долари и ќе ја обедини доминацијата на „AB InBev“ во Латинска Америка со онаа на „SABMiller“ во Африка, како и нивните пивари во Азија.
