Еден од водечките кинески производители на смартфони „Meizu“ официјално го претстави долгоочекуваниот модел „Meizu PRO 5“.
Целосно металниот смартфон се одликува со 5,7 инчен дисплеј со резолуција од 1.080 х 1.920 пиксели и еден од моментално најдобрите процесори на пазарот – „Exynos 7420“ (кој се наоѓа во моделите „Samsung Galaxy S6“ и „Galaxy Note5“).
„Meizu“ забележа и суштинско подобрување во однос на дизајнот, а експертите откриваат многу сличности меѓу новиот модел и популарниот „iPhone“ на „Apple“. Смартфонот ќе се нуди во две варијанти – со 3 и 4 GB RAM меморија, а внатрешната меморија и на двата модела ќе е 32 GB.
Една од најатрактивните можности на новиот паметен телефон е неговата 21-мегапикселна камера на „Sony“ од најновата генерација. Новиот „Meizu Pro 5“ е со извонредниот резултат од 75.000 поени во независниот тест за перформанси „AnTuTu“, а смартфонот побрзо ги вчитува апликации од моделите како „Xiaomi Note“, како и „Sony Xperia Z3 +“.
Новиот модел е со „USB Type C“ – конектор, а има опција за брзо полнење до 65% за 30 минути. Батеријата е со капацитет од 3.050 mAh.
Новиот паметен телефон е со најновата софтверска верзија на компанијата – „Flyme 5“ базирана на „Android“. Смартфонот ќе се појави на 12-ти октомври првично во Кина. Цената за верзијата со 3 GB RAM меморија е 439 долари.
