Подзаборавената германска марка „Borgward“ се врати на автомобилската сцена по паузата која траеше цели 50 години. Во Франкфурт брендот кој е ревитализиран од кинескиот производител „Foton Motor“, го претстави првиот сериски модел.
Borgward се враќа во Европа (фото+видео)
На пазарот „Borgward“ ќе се врати со кросоверот „BX7“. Тој веќе се нуди на пазарот во Кина, а во Европа треба да се појави во текот на следната година.
За време на прес-конференцијата на саемот во Франкфурт не беа откриени многу нови детали, но сепак беше нагласено дека новите модели ќе ја продолжат традицијата на марката, а ќе покажат иновативност и неповторлив стил.
„Borgward BX7“ има должина од 4,7 метри, а може да биде опремен со 5, 6 или 7 седишта. Волуменот на багажникот достигнува 1344 литри при преклопувањето на задните седишта.
Основниот мотор на моделот е бензинец со четири цилиндри и зафатнина од 2,0 литри. Агрегатот е опремен со турбо, развива 224 КС и 300 Нм, поврзан е со автоматски менувач со две спојки и располага со систем за погон на сите четири тркала. Оваа конфигурација нуди забрзување од место до 100 км/час за помалку од 10 секунди и развива максимална брзина од 200 км/час, открија од компанијата.
Се очекува и хибридна модификација, при што моќта ќе биде 401 КС. Таа ќе претставува „plug-in“ хибрид со погон на сите четири тркала, кој ќе има автономна километражата на електрична енергија од околу 55 километри. Системот комбинира 2.0-литарски бензински агрегат и електричен мотор.
Во поглед на дизајнот, „Borgward BX7“ се обложува на познатиот германски стил. Внатрешноста е опремена луксузно со кожен тапацир „Nappa“, волан со рамно дно, елементи од полиран алуминиум, 12,3-инчен дисплеј на инфо-забавниот систем и друго.
„Borgward BX7“ ќе се произведува во Кина. Се очекува цените во Европа да стартуваат од околу 26.000 евра.