Во пресрет на автосаемот во Франкфурт, германската компанија „Volkswagen“ официјално ја претстави новата генерација на кросоверот „Tiguan“.
Кросоверот е исполнет во стилот на концептот „Cross Coupe GTE“, а го демонстрира најновиот дизајн на германската автомобилска марка. Може да се забележи дека неговите димензии се зголемени, но и покрај тоа инженерите успеале да постигнат помала тежина во споредба со претходникот.
Изграден на платформата „MQB“, моделот е за 60 мм подолг и 30 мм поширок од веќе стариот „Tiguan“. Во исто време, вкупната маса е редуцирана за 50 килограми. Висината е намалена за 33 мм, а меѓуоскиното растојание веќе се протега на 2681 мм, или со 77 мм повеќе од порано.
Дополнителниот простор помеѓу двете оски за 29 мм овозможи поголем простор за нозете на патниците на задните седишта. Багажниот простор исто така нуди поголем обем – цели 615 литри, што е за 145 литри повеќе од стариот модел.
Дизајнот на ентериерот не изненадува особено, затоа што е типичен за новите модели на „Volkswagen“ – чист и функционален. Во опремата на новиот „Tiguan“ е вклучен стандарден 5-инчен екран, а со доплата може да биде поставен 8-инчен екран на мултимедијалниот систем кој нуди „Apple CarPlay“, „Android Auto“, „MirrorLink“ и друго.
Во односот на погонот, новиот „Tiguan“ е за до 24% поефикасен од својот претходник, споделија од „Volkswagen“. Палетата бензински мотори е претставена од четири турбо мотори со моќност од 125, 150, 180 и 220 КС. Дизел агрегатите се исто четири со 115, 150, 190 и 240 КС.
Основните модификации на моделот се со преден погон, а со доплата е достапен системот за погон на сите четири тркала „4MOTION“. Впечаток прави и новото управување на системот „4MOTION Active Control“ кој нуди четири режими на работа – „Onroad“, „Snow“, „Offroad“ и „Offroad Individual“.
Новата генерација „Volkswagen Tiguan“ ќе се најде на европските пазари подоцна овој месец, при што претстои да бидат објавени цените. Кон крајот на годината ќе видиме и верзија со 7 седишта, која ќе се произведува во Мексико и ќе биде достапна на одредени пазари.