Еден ден откако „Apple“ го претстави својот најнов „iPhone“, на интернет се појавија спецификациите на модел на „Samsung“ за кој се претпоставува дека е новиот симбол на компанијата – „Galaxy S7“.
Очекувањата се дека тој ќе биде претставен во две големини (по примерот на „Apple“) со дисплеј од 5.2 инчи (стандарден екран) и 5,8 инчи (фаблет). Информациите за новиот уред на „Samsung“ пристигнаа од францускиот технолошки блогер Стив Хемерстофер.
Освен што ќе биде претставен во две варијанти, новиот уред се очекува да е со новиот процесор на „Qualcomm“ – „Snapdragon 820“. Според објавените информации и податоците од тестот „AnTuTu“, новиот уред е со кодирано име „Lucky“.
Тој се одликува со 5,7-инчен екран со резолуција од 1.440 х 2.560 пиксели и доаѓа со процесорот „Snapdragon 820“, како и графички чип „Adreno 530“. Смартфонот ќе има 4 GB RAM меморија и 64 GB внатрешна меморија, а камерите ќе се 16 мегапикселна и 5 мегапикселна.
Според експертите уред со слични технички карактеристики може да е само од серијата од највисоката класа на „Samsung“ – „Galaxy“.