Надградена верзија на блиндираниот модел „A8 L Security“ во Франкфурт ќе претстави германската компанија Audi.
Предвиден како најбезбедно „Audi“ на сите времиња, ова возило веќе го исполнува стандардот „VR9“. Претходната верзија го покриваше „VR7“.
Лимузината базирана на продолжената верзија на новата „А8“, е опремена со дополнителни материјали кои ја штитат кабината. Меѓу нив се иновативни алуминиумски легури, армирана ткаенина, челик и друго. Иако е повисок степен на заштита, моделот демонстрира намалена вкупна тежина, покажуваат информациите.
Новото „Audi A8 L Security“ е опремено и со блиндирана комуникациска кутија, позиционирана во багажникот. Исто така се достапни се домофон и систем за селективно отклучување на вратите. Со доплата може да се додаде евакуациски излез, противпожарен систем и автономен систем за свеж воздух во возилото.
Моделот на купувачите ќе им биде понуден со два погонски агрегати. Помалиот е „V8 4.0 TFSI“ би-турбо, кој развива 435 КС и 600 Нм. Помоќниот мотор е „W12 FSI“ со зафатнина од 6,3 литри. Овој атмосферски бензински агрегат испорачува 500 КС и 625 Нм. И двете верзии се опремени со оптимизиран систем „Quattro“, а поради гумите „run-flat“ максималната брзина е ограничена до 210 км/час.
Новиот „Audi A8 L Security“ ќе има премиера во Франкфурт следната недела. Продажбата ќе стартува во пролетта на 2016-та година.
