Конзолата за видео игри „Xbox“ на „Microsoft“ предизвика доста контроверзии и негативни ставови во софтверскиот гигант за време на нејзиниот развој, соопштува интернет изданието „BusinessInsider“. Најмногу лут од „Xbox“ бил Бил Гејтс.
Долго време луѓе во компанијата го убедувале дека „Microsoft“ треба да направи конкурент на „Sony PlayStation“. Самиот Гејтс сепак бил против идејата, бидејќи софтверскиот гигант нема големо искуство со игрите и не гледа смисла да создава нешто што не е дел од екосистемот на „Windows“.
Првиот тим на „Xbox“ му ветил на Гејтс дека голем дел од софтверските промени во „Xbox“ ќе можат да се користат и за подобрување на „Windows“, кој ќе стане брз, стабилен и сигурен. На крајот основачот на „Microsoft“ се согласил, бидејќи одамна сакал компанијата да најде начин да се стави компјутер во секоја дневна соба, раскажува Нат Браун, поранешен софтверски архитект во „Microsoft“ и дел од првиот тим на „Xbox“.
Една година подоцна сепак никаков програмски код не достигнал од „Xbox“ до „Windows“.
„Тоа го направи Бил многу, многу лут“, вели Браун.
На крајот, наместо првичното ветување за конзола со „Windows“, „Xbox“ се појави на пазарот со свој интерфејс базиран на „DirectX“. Втората конзолa, „Xbox 360“, пак дури користеше и различни процесори и сосема се оддели од екосистемот на „Windows“.
Сегашната генерација „Xbox One“ има за цел да ја врати конзолата кон нејзиниот првичен концепт – да има оперативен систем „Windows“. Во наредните неколку недели ќе стане реалност, откако „Windows 10“ ќе биде инсталиран на сите конзоли „Xbox One“. Така Microsoft ќе ја реализира идејата на Бил Гејтс „само“ со околу 20 години задоцнување од неговиот првичен план.
