Францускиот производител на електроника „Alcatel“ претстави доста нестандарден таблет во лицето на моделот „OneTouch Xess“.
Тој е со големина на екранот од цели 17,3 инчи и со резолуција од 1.080 x 1.920 пиксели. Уредот располага со држач, кој му овозможува да стои на 30, 50 и 70 степени, во зависност од изборот на корисникот.
Огромниот таблет има некои интересни карактеристики, како двојни звучници „JBL“ со моќност од 3 вати, како и пенкало кое може да се користи. Таблетот ќе може да се снаоѓа со гестови (што ја елиминира потребата од физички допир на екранот).
„„Xess“ е еден од нашите омилени производи, бидејќи е во голем формат, ориентиран кон семејството со можност за употреба дома или на работа“, коментира Стен Ху од „Alcatel“ за време на презентацијата на уредот на саемот во Берлин.
Во однос на останатите технички карактеристики, таблетот се одликува со осумјадрен процесор од „MediaTek“ со фреквенција од 1.5 GHz, како и 2 GB RAM меморија. Внатрешната меморија е 32 GB, а истата може да се прошири со мемориска картичка. Батеријата е со капацитет од 10.000 mAh, а пак дебелината на таблетот е едвај 9.15 мм.