Канадската национална валута во понеделникот на крајот од тргувањето на берзата во Торонто го достигна најниското ниво во последните единаесет години во однос на истоимената американска валута – доларот, задржувајќи се на околу 75 американски центи.
Канадскиот луни, како што го нарекуваат уште доларот во оваа земја, беше жртва на нестабилноста на пазарите и постојаното разбивање на цените и изнесуваше 75,27 американски центи, што е дневен пад за половина цент. Последниот пат кога канадскиот долар го затвори трговскиот ден под 76 центи беше на 4-ти август, но три седмици подоцна го достигна нивото од август 2004-та година.
Канадскиот долар започна со падот уште на почетокот од годинава пробивајќи ја психолошката бариера од 80 американски центи во јануари. Во прв ред, врз канадската валута влијае остриот пад на нафтата на светските пазари, како и намалувањето од страна на тамошната централна банка на основните каматни стапки.
Понеделничкото тргување на берзата во Торонто, кое беше наречено „црн понеделник“, исто така, заврши со пад на индексот TSX, кој загуби 3,12 отсто, на 13.052,74 поени. Тргувањето го заврши со загуба на 420,93 индексни поени, а во текот на денот беше во минус и до 750 поени.
Причината за „црниот понеделник“ во Торонто, како и на другите глобални пазари, аналитичарите ја гледаат во стрмоглавиот пад на Шангајската берза, каде што индексот Shanghai Composite падна за 8,49 отсто, на 3.209,92 индексни поени.
„Сега целиот свет е во исчекување на масивна акција на кинеската влада, која треба да дејствува како базука, којашто може да го „разнесе“ сето ова лудило на пазарите“, коментираше за канадската телевизија CBS News, Марк Грант, аналитичар на компанијата Southwest Securities.