Корејскиот производител на електроника „LG“ објави дека ќе го претстави својот најнов таблет „G Pad II“ на саемот во Берлин кој ќе се одржи следниот месец.
Откако компанијата претстави 8-инчна верзија на таблетот во Јужна Кореја во овој месец, таа планира претставување и на модел со поголем екран. Новиот таблет ќе се одликува со 10,1-инчен дисплеј со резолуција од 1.200 x 1.920 пиксели, како и 224 точки на инч.
Уредот ќе користи осумјадрен процесор „Snapdragon 800 SoC“ со фреквенција од 2.26 GHz. Тоа што ќе биде уникатно во таблетот и се очекува да го привлече вниманието на потрошувачите, е неговата батерија со капацитет од 7.400 mAh, за која од јужнокорејскиот производител тврди дека е најголемата на пазарот во моментов.
Од „LG“ предвидуваат и нов режим за читање на електронски книги – „Reader Mode“, кој го отстранува синото од екранот и го прави читањето полесно за очите.
Оперативниот систем на таблетот ќе овозможува истовремена работа со неколку апликации, како и поставување на две апликации една до друга на екранот. Со апликацијата „Quick Memo +“ корисниците ќе можат брзо да ги споделат и задржуваат содржините, прикажани на екранот. Таблетот ќе биде преинсталиран со „Office“ од „Microsoft“, специјално развиен за оперативниот систем „Android“.
Понатамошни детали во врска со цената и времето за излегувањето на таблетот ќе бидат обелоденети по почетокот на саемот „IFA“ во Берлин на 4-ти септември.