„Google Translate“ веќе има нов сериозен конкурент во лицето на „Microsoft Translator“. Софтверскиот гигант ја пушти во употреба својата нова услуга, која ќе се нуди и со одделни апликации за „Android“, „iOS“, „Android Wear“ и „Apple Watch“, соопштува интернет изданието „CNET“.
Тоа значи дека преведувачот може да биде искористен на практично сите мобилни уреди со интернет конекција. Апликацијата поддржува превод преку внесување на текст, но и преку глас.
И додека „Google Translate“ поддржува само 27 јазици, „Microsoft Translator“ може да преведува на 50 јазици. Досега „Microsoft“ имаше слични услуги само за „Bing“ и преку апликацијата „Skype Translator“ што наскоро ќе стане дел од самиот Skype. Изгледа компанијата веќе се чувствува доволно сигурна во квалитетот на преводите за да може да се користат од што е можно повеќе луѓе.
„Microsoft Translator“ ќе е особено корисен за сопствениците на паметни часовници. Тие ќе можат да ги користат уредите за преведување и да ги гледаат преводите на изговорениот збор. Сите поставки автоматски се синхронизираат меѓу часовникот и смартфонот, па нема потреба да се прават по два пати.
Компанијата посочува дека апликацијата ќе биде самостојна и не е поврзана со гласовниот асистент „Cortana“, „Skype Translator“ или некој од другите слични случувања. Сепак таа ја користи истата инфраструктура и „облачни“ услуги како останатите системи. Апликацијата е бесплатна и допрва ќе се подобрува вклучувајќи и со додавање на уште јазици, коментираат од „Microsoft“.
