Американската компанија „Hennessey“ најави дека ќе го продаде единствениот примерок на суперавтомобилот „Venom GT“, кој во 2013-та година постави светски рекорд за забрзување од 0 до 300 км/ч. Возилото запиша време од 13,63 секунди и беше запишано во Гинисовата книга на рекорди.
Освен тоа, во февруари 2014-та година истиот тој автомобил постави и рекордна брзина меѓу сериските машини. На тркачката патека на вселенскиот центар „Кенеди“ во Кејп Канаверал овој „Venom GT“ успеа да развие 435,3 км/ч. Тоа е за речиси 4 километри повеќе од светскиот рекорд на „Bugatti Veyron Super Sport“ од 2010-та година.
Постигнувањето сепак не беше запишано во Гинисовата книга на рекорди, бидејќи според правилникот возилото треба да вози во двете насоки на патеката и потоа набљудувачите да ја фиксираат просечната брзина. Раководството на вселенскиот центар сепак забрани на автомобилот на „Hennessey“ да помине и во спротивна насока по тркачката патека за полетување.
Самиот автомобил е изграден на изменета шасија на „Lotus Elise“, а е опремен со 7,0-литарски твин-турбо „V8“ мотор со моќност од 1244 КС. Од возилото се произведени само 29 примероци, а нивните цени стартуваат од 1,2 милиони долари.
Засега од компанијата ја држат во тајност цената на светскиот рекордер. Официјално беше соопштено дека таа ќе биде откриена само при побарување од страна на сериозни клиенти.