Македонскиот фармацевтски гигант „Алкалоид АД“ Скопје оствари позитивни финансиски резултати во првото полугодие од 2015-та година, покажуваат неревидираниот единечен и неревидираниот консолидиран биланс на успех, покажуваат податоците кои денеска беа објавени.
Во периодот од јануари до јуни, вкупните консолидирани продажби достигнуваат 4.050 милиони денари, што е за 9 отсто повеќе во споредба со истиот период минатата 2014-та година.
Вкупниот консолидиран извоз на компанијата, пак, е зголемен за 15 проценти. Зголемување од 9 отсто е забележано и кај вкупната добивка пред финансиски трошоци, даноци и амортизација (ЕБИТДА), која во првото шестмесечје годинава достигнува 554 милиони денари, додека нето консолидираната добивка од 301 милион денари е зголемена за 5 отсто, покажува консолидираниот биланс на успех, се наведува во извештајот на „Алкалоид“.
Според единечниот биланс на успех, пак, во споменатиот шестмесечен период од 2015-та година, продажбите достигнале 3.068 милиони денари, што е за 3 отсто повеќе во споредба со истиот период минатата година. Добивката пред финансиски трошоци, даноци и амортизација (ЕБИТДА), која изнесува 537 милиони денари, бележи зголемување од околу 7 процнети, додека нето добивката е зголемена за 3 отсто.
Вкупните инвестиции во основни средства во првото полугодие од годинава изнесуваат 422.120 илјади денари.
Во истиот период, во „Алкалоид“ се реализирани 56 нови вработувања во Македонија.