„Nokia“ планира да го претстави својот прв проект во сферата на виртуелната реалност. Ова може да се случи веќе следната недела, тврди онлајн изданието „Re/Code“, повикувајќи се на свои извори во компанијата.
Засега нема многу информации за самиот уред. Се очекува да биде комплет очила за виртуелна реалност, а тоа е една од неколкуте сфери во кои „Nokia“ се надева да стане сериозен играч по разделбата со „Microsoft“.
Уредот е развиен од „Nokia Technologies“, одделот кој го создаде таблетот „Nokia N1“, неколкуте апликации за „Android“ и ќе развива мобилни телефони, ако компанијата си најде партнер кој ќе ги произведува и продава.
Засега од компанијата не коментираат на оваа тема со аргумент дека не дискутираат на гласини и шпекулации.
Финскиот производител „Nokia“ ќе има доста конкуренти во овој сегмент, меѓу кои се „Oculus“ и „Facebook“, „Google“, „Samsung“, „Sony“, „HTC“ и „Valve“.
