Западен Балкан во моментов е во најнестабилниот период во 21 век, оцени бонитетната куќа „D&B“(Dun and Bradstreet).
Како што соопшти бонитетната куќа „Rating“, која ја застапува ,,D&B” во Србија и Црна Гора, стабилноста во регионот опаѓа, а Македонија, Босна и Херцеговина и Косово се во состојба на сериозна политичка криза.
Во јулскиот извештај на „D&B“ кој ги опфаќа ризиците за бизнис во 132 земји од светот, Србија е во групата на земји со висок ризик, а од европските земји друштво и прават Грција, Кипар, Казахстан, Азербејџан и Грузија.
Од земјите во регионот подобар рејтинг од Србија имаат Словенија и Хрватска, потоа следат Бугарија, Романија, Албанија, Унгарија и Македонија на која во јули и беше намален рејтингот поради политичката неизвесност.
Аналитичарите од „D&B“ во извештајот наведоа дека Македонија доживува масовни демонстрации, БиХ страда од низа меѓусебно поврзани кризи на власта и закани за отцепување, додека Косово е во состојба на политичко распаѓање и масовен егзодус на населението.
Се наведува дека надворешниот ризик на Западен Балкан дополнително е зголемен со делувањето на ЕУ и Русија и додава дека, и покрај своите внатрешни и економски проблеми, ЕУ не е повеќе во состојба да се наметне во регионот додека, од друга страна, Русија постигнува важна стратешка предност.
„Иако не постои непосредна опасност за враќање на немирите од 90-тите, кризата во регионот би можела да се пробуди, особено доколку се влоши стабилноста во Грција. Тоа може да има сериозни последици по Србија. Во БиХ и на Косово српските заедници се многубројни додека случувањата во Македонија можат да доведат до прелевање на големата заедница на албанското малцинство на Косово“, наведуваат аналитичарите.
