Во европскиот премиум сегмент речиси целосно доминираат автомобили на најголемата германска тројка „Audi“, „BMW“, „Mercedes“. Исклучок од правилото, сепак се луксузните компактни „SUV“ модели, каде лидер е „Volvo XC60“, објави „left-lane“ базирајќи се на официјалната статистика за продажбата на континентот.
Шведскиот модел започна да зема замав уште во 2013-та година, кога заврши на четвртото место во рангирањето според продажбата. Година подоцна „XC60“ веќе беше лидер, а останува како таков и во првата четвртина од 2015-та година.
Резултатот на „Volvo XC60“ за 2015-та година е 18.173 продадени примероци кои претставуваат зголемување од 26% во однос на истиот период од минатата година. На второ место со 16.135 продажби е рангиран моделот „Range Rover Evoque“, а првиот германски претставник во рангирањето е „Audi Q5“, кој е позициониран на третото место со 15.854 возила.
Во топ 10 се наоѓаат уште, „BMW X3“ (10.828 примероци), „Mercedes-Benz GLK“ (6562), „BMW X4“ (6108), „Land Rover Discovery Sport“ (5803), „Porsche Macan“ (5733), „Lexus NX“ (3764) и „Land Rover Freelander“ (271).
Општо земено сегментот на компактни премиум „SUV“ модели се зголеми за 34% до 89.231 примероци во првата четвртина од 2015-та година. Аналитичарите предвидуваат до крајот на годинава да бидат продадени речиси 400.000 вакви автомобили или за околу 100.000 повеќе од 2014-та година.