Продажбата на паметниот часовник „Apple Watch“ не оди според првичните очекувања. Првите знаци за тоа беа видливи уште во април, но реалните проблеми се пројавиле во јуни, покажува анализата на „Slice Intelligence“.
Според аналитичарите, падот на продажбата е за околу 90% во однос на првичниот голем интерес во првите денови од неговото претставување. „Slice“ наведува дека „Apple“ веќе продава под 20.000 часовници на ден, а во некои дена под 10.000 примероци. За споредба, во неделата по почетокот на продажбата, компанијата продавала во просек 200.000 единици дневно. Но, сега „Apple Watch“ заостанува во продажба зад конкурентите како „Fitbit“.
Освен тоа две третини од сите продадени „Apple Watch“ примероци се од најевтина верзија која чини 349 долари. „Apple“ се надеваше дека ќе привлече повеќе внимание кон луксузната модификација која чини 549 долари. Според податоците на „Slice“, во САД, „Apple“ има продадено и под 2000 примероци од најскапата златна верзија на часовникот, која чини 10.000 долари.
Истражувањето на компанијата „Parks Associates“ дава и делумен одговор зошто продажбата на „Apple Watch“ не одговара на првичните очекувања. Само 9% од испитаниците одговараат дека оваа година планираат да купат паметен часовник. 40% од нив имаат план при купувањето да платат меѓу 100 и 250 долари. Само 6% би одвоиле над 350 долари, а ако уредот е со цена над 500 долари, тогаш тој треба да може да работи без смартфон, велат корисниците.
