Европската унија првпат во средата објави листа на меѓународни даночни раеви, во рамките на борбата против мултинационалните компании кои настојуваат да го избегнат плаќањето на даноци во 28-те членки на ЕУ.
На листата на Европската комисија се 30 територии, меѓу кои се Хонгконг и Брунеи во Азија, Монако, Андора и Гернзи во Европа, како и голем број даночни прибежишта на Карибите, вклучувајќи ги и Кајманските острови и Британските девствени острови.
Спроведувањето на реформи со цел да им се стави крај на повластените даночни договори е еден од предлозите на Европската комисија за борба против затајувачите на данок, со оглед на серијата покренати истраги поврзани со договори меѓу некои европски членки и компании, како што се Amazon, Apple и Starbucks.
„Денеска објавуваме 30 јурисдикции кои ги опфаќаат оние држави или територии кои веќе се наоѓаат на црната листа на најмалку десет членки на еврозоната“ изјави европскиот комесар за економски прашања, Пјер Московиси.
Според него, објавувањето на „црната листa“ е клучен чекор, бидејќи воневропските ентитети кои не сакаат соработка ќе бидат принудни на поголема соработка и усвојување на меѓународните стандарди.
На листата на ЕУ се, Андора, Лихтенштајн, Гернзи, Монако, Маурициус, Либерија, Сејшели, Брунеи, Малдиви, Кукови осторви, Наура, Ниу, Маршалските острови, Вануату, Ангвила, Антигуа и Бардбуда, Бахами, Барбадос, Белизе, Бермуди, Британските девствени острови, Кајманските острови, Гренада, Монсерат, Панама, Свети Винсент, Гренадини, Свети Китс и Невис, Туркс и Кајкос, Американските девствени острови.
Коментари