„Airbus“ ги промени во насока нагоре прогнозите за нарачки на нови авиони во следните 20 години. Од компанијата веќе очекуваат нарачки на 32.585 нови авиони во вредност од 4,9 трилиони долари, пишува „Ројтерс“.
Во септември очекувањата на „Airbus“ беа за 31.358 нови нарачки во вкупна вредност од 4,6 трилиони долари.
Овие пресметки беа претставени за време на вчерашниот авио-саем во Париз. Од европската компанија прогнозираа уште и раст на патничкиот воздушен превоз во наредните години со годишна норма од околу 4,6 отсто.
Растот ќе биде поддржан од земјите во развој.
„Кога луѓето имаат приходи, тие ги користат за да летаат“, коментира директорот на „Продажба“ на „Airbus“, Џон Лихи.
Пред една недела ривалот „Boeing“ соопшти дека очекува бројот на патници да се зголеми за 6% во 2015-та година. Американската компанија очекува нарачки на барем 750 авиони во оваа година.
