Белгискиот регулатор за заштита на личните податоци ќе подигне судска тужба против американската интернет компанија Facebook, тврдејќи дека нејзиното следење на членови и нечленови на нејзината истоимена социјална мрежа претставува кршење на белгиските и европските закони.
„Однесувањето на Facebook е неприфатливо“, изјавил за интернет порталот EUobserver, Вилем Дебукеларе, претседател на белгиската Комисија за заштита на приватноста. Ова е првпат некој европски регулатор за заштита на личните податоци да го тужи Facebook поради кршење на закон за приватноста, истакнува порталот.
Случајот се темели на истражувањето коешто го побарал регулаторот, а покажало дека Facebook го следи однесувањето на своите корисници и на другите интернет страници без нивна согласност, односно без барање дозвола за тоа, или преку „опт-аут“ механизмот.
„Како што истакна Работната група за членот 29 на Европската унија, која се занимава со заштитата на личните податоци и приватноста, ‘опт-аут’ механизам не е адекватен за добивање согласност од просечниот корисник, особено имајќи го предвид бихејворалниот маркетинг. Тоа значи дека сегашниот ‘опт-аут’ пристап на Facebook не ги задоволува условите за правно валидна согласност“, заклучиле истражувачите.
Се истакнува, исто така, дека Facebook го следи однесувањето на граѓаните кои не се негови корисници, со што се крши европската директива за електронска приватност. „Ги следат дури и луѓето, коишто јасно ќе изјават дека тоа не го сакаат“, вели Дебукеларе за весникот De Morgen.
Во мај годинава белгискиот регулатор ги презентираше своите сознанија и препораките до компанијата Facebook, чиешто седиште е регистрирано во Ирска. „Тие одговорија дека не ги прифаќаат белгиските закони, ниту надлежноста на белгиската Комисија за заштита на приватноста, како и дека станува збор за недоразбирање“, вели натаму Дебукеларе.
Портпаролката на Facebook одговорила во електронска порака дека компанијата не сака тоа јавно да го коментира. Во пораката се упатува на претходни соопштенија на Facebook дека „веќе подлежат на регулативата во Европа и ги почитуваат европските закони за заштитата на податоците“.
Овој случај ќе се најде пред судот во белгиската престолнина Брисел во четврток, на 18-ти јуни.
