Windows 10 ќе може да се синхронизира со Android и iOS

„Windows 10“ ќе може беспрекорно да се синхронизира со уреди кои користат „Android“ и „iOS“, соопшти „Microsoft“. Во „Windows 10“ ќе има вградено апликација наречена „Phone Companion“, преку која ќе се реализира оваа цел.

Таа ќе може да се поврзе со „Android“, „iOS“ и „Windows телефони“. Последните нема да имаат потреба од дополнителен софтвер и веднаш ќе започнат со работа во синхронизација со компјутерот. Уредите кои се потпираат на другите две платформи ќе добијат бесплатни апликации на „Microsoft“, меѓу кои се „OneDrive“, „Music“, „OneNote“, „Office“ и други.

Меѓу нив е и гласовниот асистент „Cortana“. Тој ќе има комплементарна улога и ќе ја остварува врската помеѓу смартфонот и компјутерите со „Windows 10“, велат од „Microsoft“. Со „Cortana“ корисниците ќе можат да добиваат потсетници за задачи и средби, да го следат статусот на претстојните летови, да создаваат документи, да добијат одговори на прашања и друго.

Се ќе се синхронизира со останатите уреди со кои корисникот е поврзан. Компанијата наведува дека некои функции на „Cortana“, на пример нејзиното активирање преку командата „Hey Cortana“, бидејќи за тоа се бара посебни овластувања во оперативниот систем, ќе бидат ограничени во „iOS“ и „Android“.

„Phone Companion“ наскоро ќе биде дел од „Windows 10 Insider Preview“, а комплементарната апликација на „Cortana“ за Android ќе биде готова до крајот на јуни годинава. Верзијата за „iOS“ се очекува да се појави малку подоцна.