„Sharp Corp.“ соопшти дека се обезбедени 200 милијарди јени (1,7 милијарди долари), спасувачки заем од главните кредитори во замена за посериозни мерки за ограничување на трошоците, oбјави „SkyNews“.
Компанијата со седиште во Осака која произведува сопствени апарати и електроника, соларни панели и екрани за паметни телефони, претходно објави нето загуба од 222,35 милијарди јени за годината што заврши на 31-ви март. Ова е трета загуба во последните четири години, а постојаните финансиски неуспеси покренаа прашања дали „Sharp“ може да преживее, барем во сегашниот формат.
Од „Sharp“ изјавија дека „Mitsubishi UFJ Financial Group Inc.“ и „Mizuho Financial Group Inc.“ ќе обезбедат нова финансиска помош, спасувајќи го „Sharp“ за втор пат во последните три години.
„Japan Industrial Solutions Ltd.“, фонд за приватни капитални инвестиции, специјализиран во помагање на компании, исто така ќе обезбеди 25 милијарди јени. „Sharp“ ќе го намали капиталот до 500 милиони јени, сметководствен маневар која ја неутрализира акумулираната загуба, но ги остава инвеститорите со акции со мала вредност, барем на хартија.
„Sharp“ планира да скрати барем 3.500 работни места преку програма за доброволно пензионирање. Компанијата прави промени и во менаџерскиот тим, иако извршниот директор Козола Таканаши ќе остане на сегашната позиција.
„Sharp“ ќе произведува мали и средни „LCD“ екрани за паметни телефони и други апарати во посебна компанија. Аналитичарите веруваат дека тоа може да е прв чекор кон отцепување.
И додека одделот за екрани е еден од најпознатите одржливи бизниси на „Sharp“, со клиенти како „Apple“ и „Xiaomi“, компанијата се бори со јужнокорејските конкуренти „Japan Display Inc.“ и „LG Display Co.“. Внатрешниот кориснички бизнис на „Sharp“ е силно оштетен од слабиот јен, кој ги крева производствените трошоци во фабриките на компанијата надвор од земјата.
Според аналитичарите и покрај новото финансирање, „Sharp“ се соочува со тешка иднина. Пред најавеното реструктуирање Аки Иријама, доцент во „Waseda Business School“, изјави дека „најлошото за „Sharp“ допрва доаѓа, бидејќи никој не може да замисли како ќе преживее“.
