Според последното истражување на компанијата „TrendForce“, во текот на првиот квартал од 2015-та година испорачани се вкупно 291,2 милиони паметни телефони, што е пад од 9,2% во однос на четвртиот квартал од 2014-та година, кога беа испорачани 320,8 милиони паметни телефони. Овој пад најверојатно е предизвикан поради слабата побарувачка на кинескиот пазар.
„Samsung“ во првиот квартал од 2015-та година ја задржа титулата водечки производител на паметни телефони во светот. Неговите уреди сочинуваа 27,8% од сите испораки на паметни телефони во тој квартал, иако во оваа бројка не се вклучени испораките на неодамна претставените „Galaxy S6“ и „Galaxy S6 Еdge“.
На второ место се наоѓа „Apple“ со удел од 19,9%, што значи дека „Samsung“ го има зголемено своето водство во однос на претходниот квартал. Имено, за време на четвртиот квартал од 2014-та година, „Samsung“ имаше испорачано 24,7% од уреди, додека американскиот гигант 23,2% од уредите.
Во текот на првиот квартал напредок забележа кинеската компанија „Huawei“ која од четвртото место се искачи на третото со 7,0% испорачани смартфони. „LG“ од петото се проби на четвртото место со удел од 6,2% од испорачаните телефони, додека „Lenovo“ забележа пад од третото на петото место со 6% од испорачаните уреди.