На саемот за автомобили во Шангај, „MINI“ ќе претстави специјални очила кои се создадени да обезбедат корисни информации и асистенции при возењето. Уредот функционира како „head-up“ дисплеј кој наместо на инструмент таблата се наоѓа на главата на возачот.
„MINI Augmented Vision“ очилата настанале во соработка со компанијата „Qualcomm“. Станува збор за уред кој претставува поедноставна верзија на „Google“ очилата и е наменет првенствено за возачите.
Во споредба со универзалниот уред кој го лансираше „Google“, очилата на „MINI“ не се елегантни и софистицирани, туку повеќе наликуваат на очила кои во минатото ги користеле возачите на автомобилските трки.
Тие му овозможуваат на возачот да не го трга погледот од патот кога ќе добие корисна информација која се проектира на стаклото на очилата, како на пример за брзината на возилото, но и за ограничувањето на брзината.
Возачот може да ги користи очилата и како навигациски уред, како за време на возењето, така и пред влегување во возилото или кога ќе го напушти својот автомобил.
Очилата помагаат во пронаоѓањето на слободно паркинг место во близина, но и при паркирањето, со оглед дека на стаклата може да се проектира одразот на надворешниот десен ретровизор.
Една од најинтересните и најкорисните функции е можноста возачот да може да „гледа“ низ делови од каросеријата, како што се покривните носачи или панели на вратите, а со тоа да се избегнат евентуалните изненадувања кои се кријат во мртвите агли.
Погледнете како функционираат очилата „MINI Augmented Vision“:
Од „MINI“ објаснуваат дека засега станува збор за прототип кој во иднина би можел да биде комерцијализиран.