„Mercedes-Benz“ планира развој на нов модел, кој ќе треба да се натпреварува со „Porsche Panamera“. Тоа го пишува весникот „Auto Motor und Sport“, повикувајќи се на свои извори.
Со развивањето на машината ќе се ангажираат експертите од делот „AMG“, а во основата на автомобилот ќе биде платформата на следната генерација на „E-Class“. Изворот за весникот открива дека ривалот на „Panamera“ нема да изгледа како доработена „E-Class“, туку дека ќе биде целосно самостоен модел.
Создавањето на вакво возило е дел од стратегијата на директорот за продажба и маркетинг во „Mercedes-Benz“, Ола Калениус, а во неа се вклучени неколку директни конкуренти на „Porsche“.
Првиот од нив е суперавтомобилот „Mercedes-AMG GT“, која треба да се бори за клиенти со „Porsche 911“.
Покрај тоа, компанијата од Штутгарт планира и претставување на компактно купе, што ќе конкурира со „Audi TT“. Тоа ќе биде изграден врз основа на хечбекот „Mercedes-Benz A-Class“, а ќе користи некои елементи од „AMG GT“. Се очекува моделот да биде готов во 2019-та година.
