Се повеќе документи се потребни во дигитален вид, а често тоа е и најлесниот начин за нивно чување и организирање. Апликацијата „Office Lens“ на „Microsoft“ е популарна меѓу корисниците на „Windows Phone“, бидејќи значително го олеснува дигитализирањето на документи и сметки.
Софтверскиот гигант објави дека „Office Lens“ ќе се нуди бесплатно и за „Android“ и „iOS“. Верзијата на апликацијата за платформата на „Apple“ дури веќе е достапна во „App Store“, додека таа за „Android“ се уште се средува.
Со „Office Lens“ корисникот прави слика на избраниот документ кој апликацијата автоматски ја оптимизира сликата и го сече вишокот елементи од него оставајќи го само документот, дури и тој да е снимен под агол. На располагање е и „OCR“ технологијата која овозможува пребарување на документите по клучен збор. Има и опција за конвертирање на сликите во „Word“, „PowerPoint“ или „PDF“ датотеки за дополнително форматирање.
„Office Lens“ може да препознава и визит карти, така што автоматски ги претвора во контакт во именикот на телефонот. Може да се сликаат и цртежи, кои ќе се вметнуваат како слики во стандардни документи.
