Новиот „Lincoln Continental“, кој пред неколку дена беше најавен како концепт, е копија на „Bentley Flying Spur“. Во тоа е убеден главниот дизајнер на британскиот бренд Лук Донкерволке, пренесува „Car Design News“.
Донкерволке ја изрази недоумицата и одвратноста од кражбата во својот профил на „Faceboоk“. На адреса на новиот „Lincoln Continental“ дизајнерот напиша:
„Јас би го нарекол концепт на „Bentley Flying Spur“ и би ги задржал четирите тркалезни фарови“.
Главниот дизајнер на „Bentley“ остави и порака на својот колега во „Lincoln“ Дејвид Вудхаус. На ѕидот на неговиот профил на „Faceboоk“, Донкерволке праша реторички:
„Сакате ли да ви ги испратиме потребните макети и цртежи на возилото?“.
За „Car Design News“, Лук Донкерволке додаде дека таквото однесување е повеќе од срамно, велејќи:
„Создавањето на копија на веќе постоечки производ дава лошо име на заедницата на автомобилските дизајнери“.
Како ќе се развие спорот меѓу „Bentley“ и „Lincoln“ ќе биде познато по стартот на саемот во Њујорк, на кој ќе присуствуваат и двајцата дизајнери. Имено, под рефлекторите на саемот ќе се одржи премиерата на контроверзниот „Lincoln Continental“.
