Видео порталот „YouTube“ наскоро ќе предложи услуга за стриминг на видео игри во реално време. Идејата е „YouTube“ да се натпреварува со популарната платформа „Twitch“, која ужива над 65 милиони активни корисници секој месец.
Желбата на „YouTube“ е да се насочи кон гејмерските и електронските спортови. Според еден од изворите на весникот „The Daily Dot“ тоа ќе е главната цел на „YouTube Live“, кога новата услуга ќе се појави во блиска иднина.
Во „Google“ веруваат дека ќе има голем интерес од страна на познатите организации во областа, како и на веќе етаблираните популарни „стримери“. Компанијата ќе бара партнерства со нив, со цел да се потпира на големата публика.
„YouTube“ експериментира со „стримови“ во живо од 2010-та година, но никогаш целосно не ја еволуирале услугата. Наместо тоа, таа стана ретка појава, а само некои компании понекогаш ги пренесуваат во живо своите настани.
Минатата година „Google“ преговараше за стекнување на „Twitch“, а се очекуваше токму оваа платформа да стане дел од „YouTube Live“. Преговорите сепак пропаднаа и „Twitch“ стана сопственост на „Amazon“ за близу 1 милијарда долари. Сега „Google“ планира свој конкурент.
Засега од „YouTube“ и „Google“ не коментираат на оваа тема. Очекувањата се дека новата услуга ќе биде претставена за време на гејмерската конференција „Е3“, која е во средината на јуни годинава.