Голем број на европски, азиски и американски автомобили имаат клонови во Кина. Не се многу, но имс модели кои можат да се „пофалат“ со неколку вакви нелегални верзии.
Па, „BMW i3“ веќе има два кинески клонови. Првиот – „Wuling City Car“, се појави на крајот на минатата година, а вториот го откри изданието „CarNewsChina“.
Автомобилот се нарекува „KWM2200“ и беше презентиран за време на саемот за електрични автомобили „Shandong EV Expo“. Производител на овој модел е компанијата „Qingzhou Da Jinma Motorcycle Corporation“, која е специјализирана за производство на мотоцикли.
Кинескиот модел има сличен дизајн со „BMW i3“, но се одликува со кичести елементи и компактни димензии. Кабината располага со четири места и исто како кај моделот на германците, и има електричен погон.
Кај кинескиот автомобил батериите се оловно-киселински, а плановите предвидуваат модерни и безбедни литиум-јонски акумулатори да бидат понудени во подоцнежна фаза. Моделот, кој е наменет за движење во град, може да развива најмногу 50 км/час. Автономијата е 120 км, а полнењето на батериите трае 7 часа, покажуваат информациите.
Кинескиот „Jinma KWM2200“ треба да биде достапен на домашниот пазар подоцна во оваа година. Се очекува стартната цена да е 24.998 јуани (околу 4.000 долари).