Очилата со додадена реалност „Google Glass“ се фундаментална платформа за „Google“. Тоа го вели претседателот на одборот на компанијата Ерик Шмит за „The Wall Street Journal“.
Според него технологијата е премногу важна и не може да се занемари. Во јануари годинава компанијата престана да ги продава „Google Glass“, а тоа веднаш беше протолкувано дека таа се откажала од очилата. Малку подоцна, проектот беше предводена од Тони Фадел, кој се приклучи на „Google“ по купувањето на компанијата „Nest“. Неговата задача е да направи уредите „подготвени за корисниците“.
„Кога ја завршивме програмата „Explorer“, медимите помислија дека сме го прекинале проектот, но тоа не е точно. „Google“ често презема ризици, но нема нешто да сугерира дека ќе ги оневозможи „Glass“. Ова е многу голема и фундаментална платформа за „Google““, коментира Шмит.
Шмит сепак не конкретизира какви промени се предвидуваат во „Google Glass“, за да бидат достапни за корисниците. Компанијата ќе треба да обрне внимание и на критиките дека очилата се идеални за шпионирање, бидејќи не се гледаат вградените камери и микрофон.
Според шпекулациите, следната верзија на „Google Glass“ ќе е со подобра батерија и дисплеј, истовремено ќе е и поевтина. Компанијата ќе се обиде да ги нуди „Glass“ и во комплет со различни очила за да ги направи поприфатливи. Овој пат сепак „Google“ ќе го задржи напредокот на проектот во тајност, додека не процени дека тој е подготвен.