Индексот на глобалните цени на стамбените единици во светот е намален во четвртото тромесечие на минатата година, за прв пат од 2012-та година за 0,6 отсто.
Падот на цените на недвижностите е резултат на турбулентните политички и економски движења кон крајот на минатата година, се наведува во студијата на агенцијата за недвижности Knight Frank, јавува Танјуг.
Украинската криза, тензиите поради грчкиот долг како и фактот што економскиот глобален раст не преминал од 3,3 отсто довеле до пад на цените на стамбените објекти во светот.
Во анализата се наведува дека цените на луксузните недвижности и понатаму растат, додека глобалниот индекс на стамбените недвижности, којшто за секоја земја се пресметува во однос на бруто домашниот производ, е намален.
Во мал број на земји цените на недвижностите се поскапени, на чело со Ирска, потоa следуваат Турција и Хонг Конг.
Во Даблин и околината становите во четвртиот квартал од минатата година поскапеле за 16,3 отсто на годишно ниво, но и покрај тоа цените се за 38 отсто пониски отколку во истиот период во 2007-ма година.
Најголем пад на цените на недвижностите е забележан во Украина и таа е единствена земја со двоцифрено поевтинување од 16,3 отсто.
На ниво на континенти најмал раст на цените има во Европа и тоа 1,6 отсто, додека на Блискиот исток е забележано поскапување од 7,7 отсто, а во Океанија 6,4 отсто.
На Блискиот исток и во Азија забележан е тренд на побарувачка на стандардни недвижности, со помала квадратура и пониски цени, што досега не беше случај.
Купувачите се одрекуваат од луксузни недвижности поради растот на данокот на ексклузивните простори во дел од земјите.
