Тајванскиот производител на смартфони „HTC“ пред само две недели го претстави најновиот предводниок во својата гама, моделот „M9“, а според информациите кои се појавија на интернет, компанијата планира претставувањето на новиот модел – „HTC E9“.
Според податоците новиот паметен телефон ќе биде со поголем дисплеј, потенок и со повисока резолуција од „М9“. Очекуваните димензии на смартфонот се 156.5×76.5×7.54 мм. Екранот најверојатно ќе е 5.5-инчен, а батеријата од 2.800mAh.
Новиот паметен телефон се очекува да е со „Quad HD“ резолуција (2.560 x 1.440 пиксели) во споредба со резолуција од 1080 пиксели кај моделот „М9“. Процесорот на новиот паметен телефон ќе биде осумјадрен од „MediaTek“ со фреквенција од 2 GHz.
Другите спецификации на смартфонот вклучуваат 20-мегапикселна камера, иста како на моделот „М9“, како и 3 GB RAM меморија и 32 GB внатрешна меморија. Куќиштето ќе е пластично, за разлика од тоа на „M9“. Се очекува моделот да биде претставен кон крајот на март.