Последната една недела беше исклучително интензивна со најави на нови нискобуџетни паметни телефони.
Првиот претставен модел беше од „Asus“, а станува збор за евтиниот „ZenFone C“. Моделот е со „dual-core“ процесор со фреквенција од 1.2 гигахерци од „Intel“, 1 GB RAM меморија и големина на екранот од 4.5 инчи со релативно ниска резолуција од 480 x 854 пиксели. Капацитетот на батеријата е 2100 mAh, а неговата задна камера е од 5 мегапиксли. Цената е 97 долари.
Малку подоцна беше презентиран и модел од еден од водечките кинески производители „Meizu“ – „М1“. За цена од 110 долари моделот обезбедува 13-мегапикселна задна и 5 мегапикселна предна камера, што е нетипично за моделите со ниска цена. Смартфонот е со 5-инчен екран со резолуција од 768 x 1280 пиксели. Тој е со технологијата „Corning Gorilla Glass 3“. Внатрешната меморија е 8GB, а таа може да се прошири со картичка до 128 GB, додека оперативната меморија е 1GB. Батеријата е со капацитет од 2500 mAh. Смартфонот се нуди во богата палета на бои.
Друг водечки кинески производител – „ZTE“, исто претстави евтин смартфон во лицето на моделот „Blade S6“. Тој е со можност за работа во мрежи од следната генерација и има 5-инчен дисплеј и процесор „Snapdragon 615“. Оперативната меморија е 2GB, а внатрешната 16 GB. Исто така, располага со 13 мегапикселна задна и 5 мегапикселна предна камера, но неговата цена е 250 долари, или далеку над споменатите до моментов модели.
Тајванскиот производител „HTC“ го претстави моделот „Desire 526 + G“, позициониран во средината на досега споменатите модели – 170 долари. Тој е со 4.7-инчен екран со резолуција 540 x 960 пиксели и осумјадрен процесор. Моделот е со 1 GB RAM меморија и 8 GB внатрешна меморија.
Нов евтин модел претставија и од „Samsung“. Моделот „Galaxy J1“ е со „dual-core“ процесор со фреквенција од 1.2GHz, 512 MB RAM и 4 GB внатрешна меморија. Тој е со дисплеј од 4.3 инчи. Се очекува неговата цена да биде околу 120 долари.
