„Samsung“ најверојатно ја разгледува можноста неговиот следен уред планиран за оваа година да работи на „Windows Phone“, наместо на „Android“.
Според пишувањето на „Korea Times“, компанијата веќе го тестирала оперативниот систем на уредите во рамките на пилот програмата.
Производителот на популарните „Galaxy“ смартфони претходно се обидуваше да ја наметне својата „Tizen“ платформа, но без многу успех.
Меѓутоа, развојот на било какво проект поврзан со „Windows Phone“ не е можен се додека не се стави крај на конфликтот поради кршењето на патенти кои „Samsung“ го има со „Microsoft“.
Претходно во август беше објавено дека „Microsoft“ има поднесено тужба против јужнокорејскиот производител поради неисплатени лиценци.
„Samsung“ е обвинет дека го користел превземањето на „Microsoft“ на компанијата „Nokia“ како „изговор да го прекрши договорот“.
Неименувани извори тврдат дека, доколку компаниите постигнат компромис, новите телефони на „Samsung“ со платформата „Windows Phone“ би можеле да се појават оваа есен.
