Загубата на „Raiffeisen Bank International AG“ (RBI) би можела да го надмине предвидениот максимум од половина милијарда евра во 2014-та година, доколку биде принудена да ја отпише вредноста од рускиот бизнис.
„RBI“ објави дека состојбата во нивната руска подружница, досегашниот главен генератор за заработка, може да се влоши и дека тие ќе бидат принудени да ја погледнат неговата книговодствена вредност со оглед на слабоста на рубљата и руските економски проблеми.
„Доколку не дојде до промени во сегашниот нематеријален имот на „Raiffeisen“ – Русија, очекуваме дека загубата во 2014-та нема да надмине 500 милиони евра“, изјави извршниот директор на банката, Карл Севелда.
Според изјавата Севелда банката ќе ги зголеми зацртаните заштеди до 2016-та година од 600 на 650 до 700 милиони евра и тој најави можност за повлекување на банката од еден или повеќе странски пазари, но таа можност не ја објасни детално.
„RBI“ моментално работи во матичната Австрија и во уште 15 земји од средна и источна Европа, а има подружници и во други земји.
Банката минатата година имаше големи проблем во работењето, како последица на случувањата во Украина и Унгарија.
