Светската продажба на смартфони во третиот квартал од 2014-та година порасна за 20 проценти во однос на истиот период од лани и достигна 301 милиони уреди, покажаа податоците на истражувачката компанија „Gartner“.
Лидер во продажбата на смартфони е јужнокорејскиот гигант „Samsung“, со удел на пазарот од 24.4 отсто, иако продажбата забележа пад од 8.89 проценти или на 73.2 милиони уреди, пренесуваат светските агенции.
Уделот на американски „Apple“ беше 12.7 отсто со зголемување на продажбата од 25.9 проценти или 38.1 милиони примероци на „iPhone“.
Раст во продажбата забележаа и кинеските производители. „Huawei“ продаде 15.9 милиони смартфони, 36.6 отсто повеќе отколку во третиот квартал од 2013-та година.
„Xiaomi“ ја зголеми продажбата за дури 336 проценти или 15.77 милиони уреди, заземајќи со тоа 5.2 отсто од пазарот.
Уделот на „Lenovо“ на пазарот на паметни телефони достигна пет проценти, откако компанијата ја зголеми продажбата за 16.5 отсто или 15 милиони уреди.
Компанијата „Gartner“ e oснована во 1979-та година и е специјализирана за истражување на пазарите на информатичките технологии.
