На почетокот на ноември пишувавме за идниот фаблет на „Samsung“ од серијата „Galaxy Grand“, односно за моделот „Galaxy Grand 3“.
Tогаш ги објавивме и повеќето спецификации, кои го вклучуваа 5.5-инчниот „HD“ екран со резолуција од 1280 x 720 пиксели, процесорот „Snapdragon 410 SoC“ со такт од 1.2 GHz, 1.5 GB RAM, 16 GB интерна меморија, камерата со резолуција од 12 MP (задна) и 5 MP (предна), како и дека новиот „Grand“ ќе ја користи „KitKat“ верзијата на „Android“.
Oваа недела „Galaxy Grand 3“ доби и официјално одобрение од кинеската агенција за регулација на пазарот на телекомуникации – „TENNA“. Воедно станаа познати и дополнителни спецификации, кои се однесуваат на големината на екранот, димензиите, дебелината и тежината на уредот, како и „microSD“ поддршката.
Наместо најавениот 5.5-инчен екран, „Galaxy Grand 3“ ќе има нешто помал екран со големина од 5.25-инчи. Исто така задната камера (главната) нема да има резулоција од 12, туку од 13 MP, додека предната наместо најавените 5 ќе има резолуција од 8 MP. Уредот ќе има димензии од 146 x 74.8 милиметри, дебелина од 7.95 милиметри, а тежината ќе изнесува прифатливи 140 грама. Од наведените спецификации видливо е дека новиот модел е за 29 грама полесен и за еден милиметар потенок од претходникот.
Почетниот простор за чување податоци од 16 GB ќе биде можно и дополнително да се прошири со „microSD“ мемориски картички. Корисниците кои ќе имаат потреба за поголем простор, истиот ќе можат да го прошират за дополнителни 128 GB.
