„LG“ официјално претстави интересна група на „Android“ телефони, наречени „Aka“, кои имаат „очи“ на куќиштето и се обидуваат да постигнат емоционална конекција со корисникот. Постојат четири видови на „Aka“ телефони, со сопствени имиња и личности.
„Eggy“ е жолт и лесно се вљубува, „Wooky“ е бел и помалку е груб, „Yoyo“ е розев и има проблеми да се придржува на својата диета, додека „Soul“ доаѓа во црна боја и е љубител на музиката. Тука е и позадинската приказна во врска со „Aka“ телефоните, која вклучува инвазија на вонземјанци.
Самиот телефон припаѓа во сегментот на средната класа. Опремен е со 5-инчен 720p екран, работи под „Android 4.4 KitKat“ оперативниот систем и има 1.2GHz четиријадрен процесор, 1.5GB RAM, камера од 8MP на задната страна и од 5MP на предната, 16GB простор за складирање, „microSD“ слот, „LTE“ поддршка и 2610mAh батерија. Камерата на телефонот има ласерски фокус, а заштитниот знак на „LG“ – копчињата за звук на задната страна, се присутни и тука.
„Очите“ на „LG Aka“ реагираат на дејностите на корисникот и служат за еден вид известување. Тие се вртат кога ќе го потресете телефонот, гледаат доле кога го вадите телефонот од куќиштето и слично. Бојата на очите се менува од црвена во зелена со цел да покажат некоја одредена емоција.
Можно е да се одберат различни куќишта, кои овозможуваат менување на „Aka“ личностите. „LG Aka“ засега е достапен во Јужна Кореја, по цена од 455 долари, но не е познато дали телефонот ќе се појави и на другите пазари.
