Откако „Peugeot“ и „Renault“ ги претставија своите концептни возила со ултра ниска потрошувачка, тоа го стори и третиот француски производител, „Citroen“.
Со цел да се намали загадувањето на воздухот во Франција, владата на оваа земја на производителите на автомобили им постави задача до 2020-та година да произведат сериски модел со просечна потрошувачка од 2l/100 km.
„Peugeot“ и „Renault“ веќе најавија дека ќе го искористат претстојниот меѓународен саем за автомобили во Париз, за на домашен терен да прикажат што досега сториле во врска со ова прашање.
„Citroen“ на овој саем исто така ќе го претстави штедливиот автомобил – концептот „C4 Cactus Airflow 2L“.
Концептот е заснован на продукциската верзија на моделот „C4 Cactus“. За да се постигне посакуваната потрошувачка, намалена е масата на возилото и подобрена е неговата аеродинамика.
„C4 Cactus Airflow 2L“ е за 100 kg полесен од сериската верзија, што значи дека неговата маса изнесува само 865 kg. За да постигне ваков резултат, одредени конструктивни делови на возилото се заменети со компоненти од полесен материјал, како што се јаглеродни влакна, алуминиум, поликарбонат.
Оптимизацијата на аеродинамичките карактеристики на автомобилот се постигнати благодарејќи на промената на дизајнот на браникот, крилата, праговите, надворешните ретровизори, како и употребата на специјален поклопец на тркалата и панелот кој го покрива долниот дел на возилото.
„Citroen“ тврди дека на тој начин се подобрени аеродинамичките својства за 20 проценти во однос на серискиот модел.
За погон е користена „Hybrid Air“ технологијата која „Peugeot“ веќе ја демонстрираше на својот концепт, „208 HYbrid Air 2L“.
Станува збор за хибриден погонски систем кој се состои од 1.2-литарски „PureTech 82“ бензинец кој произведува 82 ks, хидраулична пумпа и резервоар со компримиран воздух.
За разлика од возилото кое го претстави „Peugeot“, каде моќта на тркалата се пренесува со помош на мануелен менувач, „Citroen“ употреби автоматска трансмисија.
Концептот „C4 Cactus Airflow 2L“ е во состојба да се движи на три начини: само со помош на компримиран воздух (во „Air Power“ режимот), само на бензин и во комбиниран режим кога автомобилот користи истовремено два извори на енергија.
