Кинескиот производител на паметни телефони „Huawei“ претстави два нови модели за време на саемот во Берлин.
Едниот е долго очекуваниот 6-инчен фаблет „Ascend Mate7“ кој цели да е директен конкурент на популарниот „Galaxy Note 4“. Фаблетот е со осумјадрен процесор. Тој е составен од четири јадра на процесорот „А7“ со фреквенција од 1,3 GHz и четири јадра од „А8“ со фреквенција од 1,8 GHz. Така секојдневните функции извршени во 80% од времето при употреба на смартфоните, ќе се спроведуваат од послабите процесори, што ќе доведе до 50% заштеда на батеријата.
Главната карактеристика на моделот е неговиот дизајн. Над 95% од трупот на смартфонот е метален, па така тој тежи само 185 грама. Фаблетот располага со 13 мегапикселна камера и HD дисплеј кој користи технологија која штеди батерија.
Предната камера е од 5 мегапиксели. Верзијата со 16 GB внатрешна меморија и 2 GB RAM меморија ќе се продава за 499 евра, додека моделот со 32 GB меморија и 3 GB RAM меморија ќе се продава за 599 евра. И двете верзии на моделот ќе се појават на пазарот во третиот квартал на годината.
Заедно со фаблетот од највисока класа, кинескиот производител претстави и нов буџетски фаблет. Тој се нарекува „Huawei Ascend G7“ и е со 5.5-инчен екран со резолуција од 1280 x 720 пиксели и 267 пиксели на инч. Моделот располага со „quad-core“ процесор „Cortex-A53“ со фреквенција 1.2GHz, 2GB RAM меморија и оперативниот систем „Android 4.4“.
Тој е со 13-мегапикселна задна камера и 5-мегапикселна предна камера. Дебелината му е едвај 7,6 мм, а уредот тежи само 165 грама. Моделот е со LTE-можности и двојна антена за обезбедување на подобар прием.
Цената на овој уред ќе е само 299 евра и ќе почне да се нуди во Германија, Италија, Шпанија, Данска, Унгарија, Холандија, Турција, Полска, Норвешка, ЈАР и Мексико пред да излезе на останатите пазари.
