Додека помалите производители се мачат да претстават модел за наредната година, големите компании веќе размислуваат за неколку години унапред. Таков е случајот и кај Германците кои веќе прават планови за следните четири години.
Со цел да имаат што поширока палета на автомобили во понудата, како и пред се да заработат повеќе пари, „Audi“ планира да направи автомобил кој ќе ја пополни „дупката“ која настана во „А“ сегментот меѓу моделите „А1“ и „А3“.
Но се поставува прашањето што тоа „Audi“ може да понуди на пазарот што е мало, со врвен квалитет и што може да се продава? Изборот најверојатно ќе биде на модел кој според карактеристиките ќе биде сличен на наследникот на моделот „А2“ кој никогаш не дојде подалеку од концептот.
Сега е многу сериозно да се говори за модел кој ќе ја носи ознаката „Q20“ и кој најверојатно ќе биде хибрид или ќе се движи исклучително на електричен погон. Овој автомобил би требало да биде конкурент на моделот „BMW i3“.
