„Apple“ ќе започне производство на два нови модели на „iPhone“веќе во следниот месец. И двата уреди ќе имаат поголеми екрани од досегашната генерација на смартфонот, соопшти агенцијата „Bloomberg“.
Едниот модел ќе користи 4.7-инчен екран, а се подготвува и модификација со 5,5-инчен дисплеј. За споредба – актуелниот „iPhone 5Ѕ“ се потпира на 4-инчен панел. Плановите на „Apple“ се да ги претстават двата уреди до септември годинава.
Следниот „iPhone“ ќе претрпи и мали промени во дизајнот. Се очекува тој да е заоблен и тенок. Во иднина, пак, компанијата има уште поамбициозни идеи, затоа што веќе тестираат криви екрани, дополнителни сензори кои чувствуваат различна сила на притисок врз екранот и друго. Овие случувања сепак остануваат за некоја од следните генерации на смартфони.
Компанијата традиционално не коментира гласини и шпекулации. Одлуката да се насочи кон поголеми екрани е во спротивност со филозофијата на Стив Џобс. Тим Кук, сепак нема особено голем избор, бидејќи повеќето производители веќе се насочија кон паметните телефони со поголеми панели и тоа создава притисок врз компанијата, а таа веќе не е во состојба да ги занемари пазарните трендови.
