„Fiat“ ги здружи силите со „Mitsubishi“ со цел да ја започне изработката на веќе одамна најавениот голем пикап, кој во понудата на италијанскиот производител ќе се најде во Европа и Јужна Америка.
Неофицијални извори наведуваат дека „Mitsubishi“ на „Fiat“ ќе му ја обезбеди верзијата „L200“, a се очекува дека пикапот ќе се најде во продажба во 2016-та година.
Серџо Маркионе планира до 2016-та повторно да постигнува профит со својата компанијата која во последните три години загуби 2.15 милијарди евра. Одделението „Fiat Professional“ ќе биде задолжено и за новиот пикап, а еден од ретките успешни сегменти во компанијата, кое на годишно ниво носи заработка помеѓу 200 и 300 милиони евра.
Меѓу плановите на „Fiat“ е и зголемувањето на глобалната продажба на 600.000 единици до 2018-та година во однос на 413.000 продадени примерци во минатата година.
Во моменталната понуда на италијанскиот производител е моделот „Strada“, мал пикап кој се произведува во Бразил за европскиот и јужноамериканскиот пазар, а големиот пикап е повеќепати најавуван, но никогаш не заживеа, па поради тоа прашање е дали овој пат тоа ќе се промени.
