Кинеската телекомуникациска компанија „Huawei“ вчера во Париз го претстави својот најнов модел на смартфон– „Ascend P7“.
Моделот може да се пофали со тоа што предната камера е од 8 мегапиксели, а со тоа од компанијата сакаат да привлечат корисници кои сакаат да прават „селфи“ фотографии, кои станаа екстремно популарни во последно време. Компанијата е далеку пред своите конкуренти, чии предни камери обично се од 2 мегапиксели. Камерата исто така овозможува снимање на панорамски слики.
Уредот е со 5-инчен дисплеј со резолуција од 1920 x 1080 пиксели, а ќе може да работи и во 4 G – мрежата. Располага со „quad-core“ процесор со брзина од 1.8 GHz, како и 13 мегапикселна задна камера. Овој смартфон е екстремно тенок, само 6,5 милиметри, што е далеку под дебелината од 8,1 мм на „Sаmasung Galaxy S5“. „Ascend P7“ функционира со оперативниот систем „Android“.
Компанијата „Huawei“, која е трет најголем производител на паметни телефони во светот и има удел од 4.9 % од светскиот пазар, има намера својот смартфон да го направи еден од водечките, а тоа сакаат да го сторат благодарение на пониската цена. Моделот „Ascend P7“ ќе се нуди за 449 евра без договор, што е далеку под цената на „iPhone 5S“ – 699 евра во Германија и онаа на „Samsung Galaxy S5“ од 600 евра.