Од пред извесно време „Apple“ како да седи настрана во трката со другите производителите, кога станува збор за премиера на нови уреди. Според аналитичарите од „KGI Securities“ причината за тоа е дека во моментов компанијата подготвува неколку новини кои ќе ги претстави во наредните месеци.
„Apple“ е во процес на развој на втората генерација на таблетот „iPad Air“. Тој ќе располага со новиот процесор „Apple A8“, сензор за отпечатоци и други новитети. Според „JP Morgan“, пак новиот процесор ќе биде 64-битен и ќе има поголема продуктивност од процесорите „Core i5“ на „Intel“. Очекувањата на „KGI“ се дека „iPad Air 2“ своето деби ќе го има наесен.
Тогаш ќе биде прикажан и „iPad Mini Retina“. Компактниот таблет ќе е со уште потенко куќиште, но ќе ја задржи истата тежина и димензии. Екранот ќе е со „Retina“ технологија, а хардверот исто така ќе е подобрен.
Според „KGI“, „Apple“ подготвува и „iPad“ со дисплеј од 12,9 инчи. Тој ќе биде наменет за професионалци и дизајнери, а се очекува да се појави на пазарот веќе следната година.
Серијата лаптопи „MacBook“ ќе биде надградена. Аналитичарите велат дека „Apple“ ќе покаже 12-инчен „MacBook Air“ со „Retina“ дисплеј, а на пазарот може да го очекуваме кон крајот на годината.
Во сегментот на „iPhone“, исто така ќе има промени. Се очекува да биде прикажан модел со 5,5-инчен дисплеј во палетата на фаблети. Тој ќе се појави подоцна од „iPhone 6“, кој ќе е со 4.7-инчен екран. Според „KGI“ овој модел ќе биде хит и се очекува да оствари продажба од 60 милиони примероци во првата година.
