Најпопуларниот мултимедијален плеер „Winamp“, сепак ќе продолжи да постои. До благопријатната разврска за неговите милиони фанови се дојде откако „AOL“ успеа да најде купувач за него.
Новиот сопственик на „Winamp“ е „Radionomy“, а заедно со плеерот, компанијата ја има стекнато и радиоплатформата „Shoutcast“. Се очекува трансакцијата да е во вредност помеѓу 5 милиони и 10 милиони долари. „AOL“ ќе добие и 12 % удел од „Radionomy“.
Според информациите, новиот сопственик на „Winamp“ нема намера да прави големи промени во популарниот плеер. Сигурно е дека ќе продолжи да нуди поддршка на голем број на аудио и видеоформати, ќе нуди можност за инсталирање на разни адитиви, промена на изгледот на интерфејсот и слично. Секако, корисниците ќе можат да ги слушаат и сите 60 илјади радија кои „Radionomy“ стримува на интернет.
Со стекнувањето на „Shoutcast“, компанијата станува и еден од најголемите играчи во онлајн стриминг радио програмите.
„Radionomy“ има амбиција да продолжи да расте, веќе има околу 7 милиони евра инвестиции. Во следните недели планираат и ново собирање на капитал од инвеститори.
